تحدث عن طريقته في اختيار أدواره، بالإضافة لسبب رفضه في البداية، المشاركة في فيلم طيور الظلام مع الزعيم عادل إمام.
وقال الخولي خلال ندوة توقيع كتابه على هامش فعاليات مهرجان المسرح، المقامة بدار الأوبرا المصرية: لدي إيمان شديد بما أقدمه، وأنا أكثر ممثل بيرفض شغل، لأني لا أقدم أي عمل لا يتناسب مع أفكاري، خاصة أنني أحترم عقل المشاهد المصري والعربي.
وتابع : أنا رجل ناصري حتى النخاع، وبطبق الإسلام دون جلباب أو لحية في حياتي وأعمالي، وممكن يجيلي 3 أو 4 أعمال، ولكني أقبل عملين فقط وأسيب الباقي لأنه أكيد هيروحوا لفنان تاني ودي الاشتراكية في الإسلام اللي أنا بطبقها.
أما عن فيلم طيور الظلام قال: مشاركتي في العمل جاءت بالصدفة وقبل بدء تصوير الفيلم بـ 48 ساعة فقط، ومكنتش سعيد بالفيلم في البداية، خاصة لما عرفت من المنتج محمد زين، أن أجري سيكون 2000 جنيه فقط، وقالي يكفي إنك هتمثل قدام عادل إمام، قولتله وقتها لا عايز سينما ولا عايز حاجة.
وأضاف: مكنتش حابب الفيلم عشان لغة عربية فصحى، ولكن والدتي قالتلي يلا يا بني دي فاتحة خير، توكل على الله، وأول مشهد أصوره كان قلبي بيدق سبعة آلاف دقة في الدقيقة، اللي يشوفني يقول اتحول لعناية مركزة، ولكن مرت الحكاية بسلاسة في النهاية.