زوجة علي الحجار : هو شخص رومانسي ومش مزواج وماخفتش من الارتباط به بالرغم من تعدد علاقاته

تحدثت هدى الحجار عن علاقتها بزوجها وقصة حبهما والأغاني المقربة لقلبها، وذلك خلال فيديو نشرته الإعلامية سهير جودة عبر حسابها بموقع فيس بوك.

وقالت هدى: أنا مثل الجمهور، وأحب أستمتع بغناه، وبحضر حفلاته زي الناس لأن دي المتعة بتاعتي، وبعدين علشان أنا مراته بقى ولازم أقف جنبه وأشوف لو عايز حاجة.

وكشفت تفاصيل أول لقاء جمعهما وكيف تعرفت عليه، قائلة: كنا أصحاب في البداية وهو كان صديق زوج صديقتي، وحصل تواصل بينا في أول مرة شوفنا بعض، ومكنش حب من أول نظرة، ولكن فضلنا أصحاب لمدة سنة تقريباً، صحاب بس، ثم تزوجنا بعد تعارفنا بعام.

وأشارت إلى أنها لم تلتفت لما كان يتردد حوله بأنه شخص مزواج ودخوله في أكثر من علاقة قبل معرفتها به، قائلة: قبل ما نتجوز فضلنا أصحاب لفترة، فعرفته على حقيقته، وهو مش علشان ارتبط كتير يبقى مزواج، ولكن هو شخص طبيعي حظه مش حلو، ولكن شخصيته لا يوجد بها شئ يجعلني أخاف منه، وسنوات زواجنا العشرين تثبت صوابي.

واختتمت : علي الحجار شخص هادئ بطبعه ومسالم وليس لديه طلبات ولو في مشاكل بينا هو اللي بيبتدي بالصلح، وهو شخصية رومانسية في العادي، لكن ممكن يبقى متوحش في شغله، لإن شغله كل حياته.